दोलखाको भिमेश्वर पाखलतीमा दुई सय महिलाहरुको पाठेघर जाँच

दोलखाको भिमेश्वर नगरपालिका–२ पाखलतीस्थित स्वास्थ्य चौकीमा स्थानीय दुई सय महिलाहरुको पाठेघर जाँच तथा परामर्श साथै सर्जिकल क्यान्सर सम्बन्धी स्वास्थ्य जाँच गरिएको छ ।

समाजसेवी दिपमणि राजभण्डारीको पहलमा रोटरी क्लब अफ ओकल्याण्ड र रोटरी क्लब अफ बयरा अमेरिकाको सहयोगमा स्वास्थ्य जाँच गरिएको हो ।

नेपाली कांग्रेस दोलखाका प्रवक्ता राकेश श्रेष्ठका अनुसार जनस्वास्थ्य सरोकार ट्रष्ट (पीएचइसिटी)को प्राविधिक सहयोग र काडमाण्डु मोडेल अस्पतालका बरिष्ठ विशेषज्ञ डाक्टरहरुहरुको सहयोगमा ३० देखि ६० बर्ष उमेर समूहका महिलाहरुको निशुल्क जाँच गरिएको हो ।

पाठेघरको मुखको क्यान्सर पत्ता लगाउने अत्याधुनिक प्रविधिसहित स्वास्थ्य जाँच गराउन पाउँदा स्थानीय महिलाहरु खुशी भएको वडा नम्बर २ का वडाध्यक्ष स्टालिन श्रेष्ठले बताए ।

‘सर्भाइकल क्यान्सर स्क्रीनिङ एण्ड टेस्टिङ प्रोग्राम’मार्फत एचपिभी डिएनए टेष्ट ल्याब मेसिन हस्तान्तरण गरिएको थियो । सोही मेसिनका लागि आवश्यक पर्ने पीसीआर भ्याक्सिन (रिएजेन्ट केमिकल) सोहीबेला उपलब्ध गराइएको थियो ।