सिन्धुलीको छेत्पाबाट पोखरा पुगेको हायू परिवार फेरि फर्किँदै सिन्धुली,

काठमाडौं । साउन ११ गते सिन्धुलीको गोलन्जोर गाउँपालिका–६, छेत्पाबाट पोखरा पुगेको हायू परिवार अन्ततः पुनः सिन्धुली फर्किने निर्णयमा पुगेको छ।

यसअघि उनीहरूले पोखरामै बस्ने अडान लिएका थिए र सिन्धुली फर्कन अनिच्छुक देखिएका थिए। तर पछिल्ला छलफल र समन्वयपछि उनीहरू पुनः आफ्नै गाउँ फर्किने सहमति भएको हो।

हायू परिवारका सबै सदस्यहरू सपरिवार पोखरा गएका थिए।

उनीहरू विभिन्न सामाजिक, आर्थिक र पारिवारिक कारणले गाउँ छाडेर पोखरा गएका थिए भन्ने बुझिएको छ। पोखरा गएपछि उनीहरूलाई फर्काउन स्थानीय जनप्रतिनिधि, सामाजिक अभियन्ता तथा समुदायका अगुवाहरूले निरन्तर समन्वय गरेका थिए।

स्रोतका अनुसार, गाउँ फर्किएपछि हायू परिवारका केही सदस्य वडाध्यक्ष रविन श्रेष्ठको घरमा बसोबास गर्नेछन्।

हाललाई स्थायी रूपमा घर बनाउन सक्ने अवस्था नरहेकाले वडाध्यक्ष श्रेष्ठले अस्थायी रूपमा उनीहरूलाई आफ्नै घरमा राख्ने व्यवस्था मिलाएका हुन्।

स्थानीय वासिन्दाहरूले हायू परिवारको फर्काइलाई सकारात्मक रूपमा लिएका छन्।

गाउँमा बस्नुपर्छ भन्ने सन्देश दिन यो एउटा महत्वपूर्ण घटना भएको उनीहरू बताउँछन्। यसले अन्य परिवारलाई पनि गाउँमा बसेर आत्मनिर्भर बन्ने प्रेरणा दिने विश्वास गरिएको छ।

वडाध्यक्ष श्रेष्ठले भने, “हामी गाउँ छाडेर जानेलाई फर्काउने अभियानमा लागिरहेका छौं। हायू परिवारको फर्काइ पनि यसैको एक उदाहरण हो। गाउँमा सबैलाई समेटेर अघि बढ्न हामी तयार छौं।”

हायू परिवारको पुनः आगमनसँगै स्थानीय तहले उनीहरूको आवास, जीविकोपार्जन र समाजमा पुनःस्थापना गर्न आवश्यक सहयोग गर्ने बताइएको छ।

सिन्धुली फर्किएको यो कदमले देशका अन्य ग्रामीण क्षेत्रबाट शहर पलायन भएका परिवारलाई पनि आ–आफ्नो गाउँ फर्कन प्रेरणा दिने विश्वास गरिएको छ।