काठमाडौं, साउन ३ — मेडिकल व्यवसायी तथा राष्ट्र, राष्ट्रियता, धर्म, संस्कृति र नागरिक बचाउ महाअभियान का संयोजक दुर्गा प्रसाईंलाई प्रहरीले पक्राउ गरेको छ। उपत्यका अपराध अनुसन्धान कार्यालयबाट खटिएको प्रहरी टोलीले उनलाई भक्तपुरस्थित निवासबाट नियन्त्रणमा लिएको हो।

प्रहरीका अनुसार भक्तपुरका प्रहरी प्रमुख (एसपी) सूर्य खड्काको नेतृत्वमा गएको टोलीले भक्तपुरको निकोसेरास्थित प्रसाईंको घरबाट उनलाई पक्राउ गरेको हो। पक्राउपछि उनलाई जिल्ला प्रहरी परिसर भक्तपुरमा राखिएको छ।

प्रसाईंले आइतबार दिउँसो पत्रकार सम्मेलन गर्दै नयाँ आन्दोलनको घोषणा गरेका थिए। आन्दोलनको घोषणा सार्वजनिक भएको केही समयमै प्रहरीले उनलाई नियन्त्रणमा लिएपछि घटनाले राजनीतिक तथा सामाजिक वृत्तमा व्यापक चर्चा पाएको छ।

प्रहरीको उच्च स्रोतका अनुसार प्रसाईंलाई नियन्त्रणमा लिइएको पुष्टि भएको छ। यद्यपि पक्राउको विस्तृत कारणबारे प्रहरीबाट औपचारिक जानकारी सार्वजनिक हुन बाँकी छ।

गत वर्ष काठमाडौंको तीनकुने क्षेत्रमा भएको प्रदर्शनअघि पनि प्रसाईंले आन्दोलनको नेतृत्व गरेका थिए। उक्त प्रदर्शनका क्रममा भएको हिंसात्मक घटनामा दुई जनाको मृत्यु भएको थियो। त्यसयता पनि उनी विभिन्न मुद्दामा पटक–पटक पक्राउ परेर कानुनी प्रक्रियापछि छुट्दै आएका छन्।

यसअघि जेठ ४ गते पनि प्रहरीले प्रसाईंलाई पर्साको वीरगञ्जस्थित दियालो होटलबाट पक्राउ गरेको थियो। त्यतिबेला सामाजिक सञ्जालमार्फत अपशब्द प्रयोग गरेको आरोपमा उनीविरुद्ध मुद्दा दर्ता गरिएको थियो।

प्रहरीले प्रसाईंमाथि आवश्यक अनुसन्धान जारी रहेको जनाएको छ। पक्राउसँगै उनले घोषणा गरेको आन्दोलनको आगामी अवस्था कस्तो रहने भन्ने विषयमा चासो बढेको छ।