यु-१९ महिला टि-२० विश्वकप : नेपालले कुवेतलाई १६५ रनले हरायो

युनाइटेड अरब इमिरेट्स (युएई) मा जारी आइसीसी यु–१९ महिला टि–२० विश्वकपको एसिया छनोटको पाचौँ खेलमा नेपालले कुवेतलाई एक सय ६५ रनको  फराकिलो अन्तरले हराएको छ ।

युएईको अजमानस्थित द सेभेन स्टेडियममा मंगलबार नेपालले दिएको दुई सय १४ रनको लक्ष्य पछ्याएको कुवेतले १३ ओभरमा सबै विकेट गुमाएर ४८ रन मात्रै बनायो ।

कुवेतका लागि जिफा जिलानीले सर्वाधिक ३६ रन बनाइन् । उनले ४२ बलमा ७ चौका प्रहार गर्दै ३६ रन बनाएकी हुन् । जिफाबाहेक कुनै पनि खेलाडीले दोहोरो अंकको रन बनाउन सकेनन् । यस्तै, आयशा इकबाल पेवेकरले ४ र ईशान्वी मोहन सिंहले एक रन बनाइन् । अन्य खेलाडीले एक पनि जोड्न सकेनन् ।

कुवेतका लागि क्यान्डिस डायस, रेलिन मारिया डी सुजा, अमिषा राम ओलाचेरी, पर्ल सेरेना साइमन, साराह जसवी, जिनिया अफरोज, खादिजा जाहिर हुसेन र खादिजा खालिद अहमद कादरीले एक रन पनि जोड्न नसकेका हुन् ।

नेपालका लागि कप्तान पूजा महतोले सर्वाधिक ५ विकेट लिइन् । त्यस्तै, रचना कुमारी चौधरी र सीमा केसीले समान दुई/दुई विकेट लिए ।